Sci-Fi nostalgía

Ég er búinn að vera eitthvað voðalega latur að skrifa síðustu daga, en ætla að bæta það í dag. Ég er nefnilega nýbúinn að redda mér V og V: The Final Battle, en þetta eru gamlir sci-fi þættir sem að eru ótrúlega skemmtilegir, þeir eru eitthvað svo rosalega 80´s. Tæknibrellurnar algjör snilld, og allur klæðnaður og hárgreiðslur gera þættina ódauðlega að mínu mati.

Ég er nýbyrjaður að horfa á þetta, en báðar seríurnar eru samanlagt 24 tímar að lengd, svo að ég verð einhvern tíma að horfa á þetta allt saman aftur. Söguþráðurinn er eitthvað á þessa leið:

Geimverur koma til jarðarinnar og þykjast þurfa á okkar hjálp(mannkynsins) að halda, en eru í raun og veru komnar til að stela öllum auðlindum jarðar og hneppa mannkynið í þrældóm.

Ég man að ég sá þessa þætti þegar ég var yngri og mér þóttu þeir algjör snilld, og það litla sem ég er búinn að horfa á af þessu síðustu daga er ennþá snilld, en núna eru það hlutir eins og gamaldags tæknibrellur, hárgreiðslur og klæðnaður sem skemmtir mér töluvert meira en það gerði á sínum tíma. Og svo auðvitað að þetta er skemmtileg saga. En til gamans má geta að margt í hegðun og framkomu geimveranna minnir mann óneitanlega á ríkisstjórn George Bush og félaga ;)

Mér til mikillar ánægju sá ég að það stendur til hjá NBC að gera 3 tíma kvikmynd, sem gerist 20 árum eftir að seinni serían endar. Og hlakka ég mikið til að sjá hana, en söguþráðurinn fyrir þá mynd er á þessa leið:

20 árum eftir lok síðustu þáttaraðar eru geimverurnar komnar með algjör yfirráð yfir jörðinni, og stór hluti mannkynsins er kominn á band með geimverunum, nú stefna geimverurnar á enn stærri og hættulegri landvinninga. Og mótspyrnan virðist vera að tapa stríðinu þegar að þeim birtist allt í einu sterkur og óvæntur bandamaður.

Samkvæmt fréttinni sem ég las, þá er verið að semja við flesta af gömlu leikurunum um að leika í nýju myndinni, ég vona bara að eins vel takist og tókst með nýju þættina af Battlestar Galactica.

Tjáðu þig

Geiri3D skrifaði 30.03.04 10:13 | (Tracback)