Árið sem leið...

Nokkrir skondnir hlutir sem ég man eftir:

Samfylkingin var öruggur sigurvegari kosninganna að eigin sögn, en samt náði Ingibjörg Sólrún Gísladóttir ekki inn á þing, og ríkisstjórnin hélt velli.

Email ormur olli því tímabundið að ekki var hægt að senda tölvupóst, það góða við þennan orm var að í heilan dag fékk ég ekki email sem bauð mér upp á að stækka á mér typpið eða að kaupa Viagra með afslætti.

Jennifer Lopez og Ben Affleck, sem gerðu það eitt árið 2003 að leika í GIGLI, mynd sem var svo slæm að Bandaríkjamenn eru að notast við hana til að pynta Saddam Hussein, fengu mesta athygli fjölmiðla um gervallan heim. Leonci segist ætla að leika í GIGLI2.

Bandaríkjamenn sýna mátt sinn með því að hætta að kalla franskar kartöflur "French Fries" og í staðinn fara að kalla þær "Freedom Fries". Frakkar heimta að Frelsisstyttan verði endurskýrð Pommes.

Bandaríkjamenn fínpússa tæknina við að halda þjóð sinni í klóm óttans með því að vera sífellt að hrópa úlfur úlfur, sala á vatnsbrúsum, vasaljósum og niðursoðnum mat nær hámarki. Sem dæmi um hve fólk er utan við sig seljast 3 eintök af GIGLI á DVD.

Bandaríkjamenn fá ýmis bananalýðveldi í lið með sér til að fara í stríð við Írak, þjóðir eins og Guam, Puerto Rico og Ísland.

Hljómsveitin Dixie Chicks er tekin af lífi í Texas fyrir að hafa skoðun, við mikinn fögnuð Bandaríkjamanna, leiðandi þjóð málfrelsis og landið sem selur Freedom Fries.

Fjöldi þeirra sem dóu á árinu úr SARS endaði í 5.000, þar af 4.950 eigendur ferðaskrifstofa í Asíu sem frömdu sjálfsmorð.

Hersveitir í Írak finna 3 bolla af sykri í eldhúsi einnar af höllum Saddams, CIA bendir á að þetta geti valdið tannskemmdum. Halldór Ásgrímsson telur þetta réttlæta þátttöku Íslands í stríðinu.

Írakar taka frelsinu fagnandi, og til að sýna Bandaríkjamönum og þeim þjóðum sem þátt tóku í að frelsa þá, halda þeir upp á frelsunina daglega, oft með stórum bílasprengjum og öðrum flugeldum, frelsurunum til mikillar ánægju.

Ísrael byggir risavaxin gasklefa utan um Palestínu, Bandaríkjamenn styðja verknaðinn segjandi "Ísraelar áttu þetta alveg inni".

Arnold Schwarzenegger er kosinn fylkisstjóri í Kaliforníu, segist ætla að leysa fjárhagsvandann með frösum eins og "I´ll be back" og "Get down!".

Bandarísku höfundarréttarsamtökin RIAA, taka 86 ára gamla konu af lífi fyrir að hafa notað rafmagn, á grundvellinum að rafmagn þurfi til að keyra forrit eins og KaZaa og Grokster.

Madonna og Britney Spears kyssast, trú á guð hjá karlmönnum eykst um 300%.

Bush tryggir að Bandaríkin verði í náinni framtíð B-klassa þjóð með því að skuldsetja þjóðina í botn, talað er um að hætta að tengja dollarann við hluti eins og verð á olíu ofl...

Þingmenn gáfu sjálfum sér betri eftirlaun, þjóðin mótmælti með því að hugsa illa til þingmanna í 2 mínútur.

Til að auka öryggi þegna sinna gera Bandaríkjamenn öll flugfélög sem ætla að koma til Bandaríkjanna skyldug til að vera með risavaxin korktappa fremst á oddi flugvélanna. CIA skilgreinir tappatogara í framhaldi sem Weapons Of Mass Destruction.

Vestfirskur maður sem hló að áramótaskaupinu var sendur til Kára Stefánssonar í Íslenska Erfðagreiningu, talið er að hann sé með of mörg hláturgen.

Geiri3D skrifaði 05.01.04 16:13 | (Tracback)